Keima Pakai lhacha Rev. Lhunjang (Hejang) Kipgen, Tamenglong District, West Buning khoa kana pengin, sopi pasal khat leh numei sagi kaneiyin ahi. Kaneo laiya patnin kanu kapa natoh in kana kithopi jin ahi. Buning gamsung anomin ijakai bulhinset na mun jong anahiye.
September 1993 chun thinglhang mi holah a milong hotoh kigal douna jeh in inle lou kihal tona leh kithatona ana umin, chuleh themmo na bei chapang jong tampi eina that uvin, chukeu hilouvin khodanga konin pasal tampi jong ana that uvin ahi. Kachen nau kho tampi chu inle lou, neile gou ijakai ahal lhauvin genthei na angahna beijin kana thoh tauvin ahi. Hichun nople da umlouvin kahinkhou huhhing na dingin it umtah Buning gamsung chu dalhan kahung jamdoh tauvin ahi.
Phatchom khatna dingin Sapormeina (Senapati) tun Kangpokpi District, Manipur muna kaki nga uvin, State Government in lha thum eiki thopi uvin hiti chun hinkho kahin manguvin ahi. Lhathum kichai phat'in keiho kihinso thei nading kaki ngaito cheh tauvin, thinglhanga kona hungdoh akihi jeh in hindan leh kivahdan ahahsa lheh jengin ahi. Adeh a kapa le kanu natohna neilou (service) ahijeh lhon'in mi 14 insungmi kivah dingdan aumthei tapon, chutoh lhon'a keiho chapangse School kakai nomlheh vangun sumle pai umlou jeh in eikaisah thei tapouvin, chugoh hilouvin jingkah, nilhah nehding jong kisuhto joulouvin hinkho kanamang tauvin ahi.
Nikhat kapa le kanu koma school kakai nom'e neisol lhon'in katileh amani jong akive to lhon'in seiding beiyin aum jenglhon'in, mitlhi pum'in aka den jenglhon tan ahi. Hichun kenjong amani umchan kaven ahileh kathoh jou tahih in kapotdoh in amani mulouna muna kakap in, Chu in Pathen koma kataovin lekha kasim nom'e neiki thopin lang, lampi neisem peh in tin kana taovin ahi.
Phat ahungche jingin...nikhat window a konin kada doh in ahileh kaloi, kagolho school kaidingin ucha, loicha cheho kamu chun kathang ase valin kakapdoh jengin ahi. Ajehchu lekha phate a sim'a officer lenkhat hiding chu kalungtup anahi. Ahin keija dingin imacha lampi umthei tapon, koima la eipanpi a eiki thopi dingjong kana neijou tapon, hichun kalungthim asu nalheh jengin ahi.
Kaki hinso theina dinguvin gun (River) vadungah nel kaloh jiuvin, song kakheng uvin bolthei hih jongleng nehding kichoh jouna dinga kaboltei u angaitan ahi. Nilhah ahiteng kaboldoh kham kham u kahin kijohpa jiuva, hiche a chu nilhah nehding kahin kichohpa jiuvin, hiti chun hinkho genthei tah in kum phabep kahin manguvin ahi.
Kum phabep hitia hinkho kahin man jinglai uvin, Pathen lungset vangin Sopi Mr. Ricky Haokip'in kapa, kanu koma Emmanuel Children home, Raipura, Kota, Rajasthan muna manbeiya lekha simna theiding thu ahungsei peh in, hichun keijong eina soldoh gotauvin ahileh, chena ding sum kanei kit tapouvin, hichun kani Neineng'in eingailut behseh jehchun ama Matric certificate a chun bank loan ana lan eina soldoh tauvin ahi. Kum 1995 chun Class VIII Hindi Medium a kaga kithah pat'in hiti chun lekha kahinsim toupeh in, matric jouvin Pathen lungsetna jallin 1998 kumin Emmanuel Bible College a B.Th kahin sim pan'in ahi.
B.Th final year kahi laiyin Pathen in achesa kahinkho man ho eihin thah geldohsah in, genthei hahsa tah a kana umlaiya eikithopi ding kangaichat laitah a koima keija dinga ana umlou kalungthim sunga agingjing jengtan ahi. Hichun achesa phatna ken kana ngaichat banga chu tu a jong chapang genthei hahsa, chaga mitampi um ahin amaho dinga pan iti kalah dingham tihi kalungthim'in aum jing tan ahi. Keijong Pathen in lampi eiko mupeh dinga mi eina solpeh banga, kenjong tua chapang tamtah hinkho semna dinga panlah ding tin kahung kigel lha jengtan ahi. Chapang nule pa neilou, insung hahsat jeh a lekha simjou talouho, chuleh ngaicha ho puihoi theina dingin Pathen in lunggel eihin pepan in tun chapang mi 4 a aki kipan thei tan ahi.
Pathen lungset in tun jile cha kaneiyin kaloinu min Nu Veiting (Evangelist) Pathen in lunggel kibahpi tah khat in eipen ahi, chutoh lhon'in chanu Lamneichoi@Blessy leh Chapa Kamgoulun@Samuel jong eipeh ben ahi.
Hiche lungtup lentah neipum'a Ebenezer Ministries India hi ahung kigongdoh tan ahi. Hiche hi Pathen tahsan le ama a kisonga hung kipandoh ahi. Hiche na dinga hi angaicha chapang hon tahsa lama themjilna anei uva, Lhagao lama jong Pathen dihtah a akimu dohthei na diuhi lungtup lenpen ahi. Hiche ministry hi Pathen aneipa ahin, chuleh koi hijongleh panla nomchan'in pan ilah khom uva chapang hinkho semna, gamle nam, chule Pathen natohna a ikitho khomdiuvin jong kahin tem uvin ahi.
